التسـرب العـاطفـــي

طبعا عنوان الموضوع ملفت للنظر و غريب ، طيب ما تيجوا نفكر كدا ولو لحظة في معنى الموضوع ...
تسرب ،،، عاطفي ،،، اظن المعني واضح ، تسرب عاطفي زيه زي التسرب الاقتصادي زى التسرب الاجتماعى ........ إلخ إلخ ، طيب ايه المقصود هنا ؟
المقصود هنا هو التحول الى حالة اللامبالاه و اللاشعور بالآخر و دا بيكون تسرب للمشاعر والعواطف اللي كانت قبل كدا موجودة ، وبدأت تدريجيا مستواها يقل ، او حصل انفجار في القالب المحتوي لتلك المشاعر نتيجه خطأ حصل او احداث حزينة او سوء معاملات ......... الخ من الاحداث اللى بتسبب خلل في العلاقات بين الناس .
طيب ماشي ... لما تكون عندنا علاقه حب او علاقة صداقة او علاقة زوجية او علاقة مهنيه بين طرفين او اكثر و حصل حدث ما أدى الى نفور البعض او ابتعادهم عن الهدف الذي بُنيت له العلاقة ،،، هذا يسمي بالتسرب في المشاعر و يمكن ان يكون تسرب في المعاملات الباطنية للانسان و تبدأ تتسرب مشاعرنا شوية شوية لحــــــد ما نلاقي فجأة انتهت العلاقة او انفجرت بمشاجرات او انتهى الخيط بين الاتنين .
اوك .... عرفنا المعنى و المشكلة ,,, طيب ايه الحـــــــل ؟
الحل يا حبيبي القارئ انك تعرف فين الثقب اللى عامل عندك تسريب ، و تعرف هتسد الثقب دا ازاى .
لو عندك خلاف حاول تعمل عليه تسويه و تنهيه و تقفل ملفاته و ترجَع علاقتك تانى و تبنيها من جديد ،، خصوصا في العلاقات العاطفية حاول متشحنش نفسك ع الفاضي و ترمي الغلط ع غيرك حاول تسيب اسباب بينك و بين نفسك لأنك متعرفش الطرف التاني اخطأ ليه او عمل كدا ليه لأنه اكيـــــــــــــــــد لو بيحبك مش هيكون قاصد يعنى .
الموضوع عبارة عن انك تكون زى الاسفنجة تمتص تمتص تمتص لاخر لحظة و تفرغ في مكان بعيد فاضي ، لو انك مستني ع الواحدة او انتى مستنياله ع الواحدة يبقى هو دا اللي هيعمل خلل عندكم و يبدأ يسرب عواطفكم ف الشارع و للأسف مش هتقدروا تلموها تانى .
التسرب العاطفي اكبر المشاكل و الكوارث اللى ممكن نشوفها لاننا مبنكونش دريانين بيها و منعرفهاش الا بعد فوات الاوان علشان كدا قولت عليها تسرب لانها بتكون خفيفه و هادية لدرجه اننا منحسش بيها اطلاقــــــــــــــــــــــــا ً .
عندك تسرب ...... ؟
حط ايدك على مكان التسريب و سبب التسريب ... ابدأ في معالجته من الجذر ، متعالجش علاج مؤقت ومسكن و تقول خلاص .. لأ .. عالج من الجذور .
هتقدر تكمل يبقى ايدأ علاقتك بقلب جامد ...
عندك شك ؟ يبقى تقف مكانك و متظلمش حد معاك .
بتعرف تحب و تكون أد كلمتك و تتحمل المسؤلية ... اتفضل بس بشكل قانونى يرضاه الله عز وجل و يرضاه المجتمع .
لكن هتلعب شوية و تتسلى ...... افتكر ان الكاس اللى بتملاه دا انت اللى هتشرب منه في الاخر .. ماهو معلش (( كما تدين  تُدان )) و هتـُدان هتـٌدان مفيهاش مفـر .

هو دا موضوعنا ......... هى دا كلمتنا ........ اختيار حياتك صـح 🔋 .


تحياتى لكم / عماد محمد .