دقيقة من عمري

دقيقة من عمري عدت و فاتت
دقيقة سحبت وراها حياتى اللى ماتت
غربة جوا غربة و لحظات راحت
كلمات بسيطه ابدأ بيها كلامى و خواطري ، اشكى فيها ايامى ، اشكى فيها غربتى ، اشكي فيها رحلتى
يمكن تكون الغربه مفيده لكنها قتلت حاجات كتير قصادها ، يمكن تكون حققت حلم او احلام كتير
بس على حساب ايه ؟   ،،، على حساب حياة تانيه كامله .
تركت اهلى و بلدى واصدقائي ، نسيت افراحهم و احزانهم ، من انشغالى .
مبقتش عارف امتى المعاد ، او بمعنى اصح مبقتش عارف اعرفهم ، الوقت قتل كل لحظاتى 
مبقاش فيه تواصل زى زمان 
مبقاش فيه ضحكة زى زمان 
مبقاش فيه فرحة زى زمان
مبقاش فيه لمه زى زمان
مبقاش فيه دفء و سعاده زى زمان
راح كل شئ مقابل انك تحقق جزء من احلامك
اه كان عندى حلم و حققته ، بس دفعت التمن غالى اوى
دفعت التمن راحتى و استقرارى ، دفعت التمن انى مشوفش اهلى الا كل سنتين ع الاقل ، دفعت التمن انى محسش بضمة حضن امى و ابويا ، دفعت التمن انى محسش بسند اختى و اخويا ، دفعت التمن انى محسش بحاجه صاحبي ليا جنبه وقت شدته .
حاجات كتير لا تعد ولا تحصى ، لو اتكلمت فيها لا يكفيني كلام العالم كله ، التمن غالى اووى .
فعلا كل شئ له تمن ، بس التمن دا اغلى من اى سعر تانى ممكن تدفعه مقابل سعاده او استقرار .
الغربة .......... وجـع ميحسش بيه الا اللى عايش اركانه و محسور بين اسواره و مسجون بين حيطانه حتى الشباك مبيتفتحش 
و يوم لما تلاقي منفذ .......... يطلعلك ......................... ايواااان هو دا .
طيب امتى ؟
احس باللى اتحرمت منه السنين اللى فاتت ، احضن امى وابويا ،، اضحك من اخواتي ، العب من ابنائي ، اكون سند حقيقي لزوجتى .
الايام بتعدى من عمرنا ، بتجري ، زى البرق ...
...........................................................................
خواطر عابرة .