سكة سفر

 

حياتك سكة سفر

محتاج تاخد معاك شوية حاجات تعينك في سفرك

محتاج شوية عزم ولو تقدر تكتر كتر على اد ما تقدر

محتاج معاك ارادة علشان هي اللى هتساعدك تكمل الطريق

و محتاج كمان شوية اجتهاد لان الطريق مش كله سهل

و محتاج تاخد كمان شوية جد لانك هتقابل شوية عقبات مينفعش تستهتر بيها

و محتاج تاخد معاك ثقة و دي حافظ عليها لان هيقابلك قطاع طرق هيحاولوا يسرقوها منك

و متنساش اهم حاجه و هي الايمان ، مش هتعرف تكمل الطريق من غير الايمان ( ايمانك بنفسك وقدرتك على انك قادر تسافر ، قادر تحقق هدفك ، قادر توصل لنهاية الطريق بآمان ) دا طبعا مكلل بتاج ايمانك بالله عز وجل

و كمان محفظة مبادئك اللي هتشتري بيها عزة نفسك و قوتك

و خلي بالك من الطريق كويس و انتبه لأنه مليان اشارات ، اوعى تكسر اي اشارة منهم لأن المخالفه فيه تمنها غالي اوي

و انتبه كويس من اللوحات الارشادية اللي هتوجهك للطريق الصحيح ، لانك لو تهت ، هيكون صعب ترجع بل هيكون مستحيل في اغلب الاوقات انك ترجع تعيد المسافة تاني لان الطريق اتجاه واحد

طريق حياتك خليه علطول منور اوعى تطفي كشافاتك بظلم او خداع او نفاق

يا ترى ممكن تاخد ايه كمان معاك في سفرك ؟